Vorið kemur, heimur hlýnar

Þvílík forréttindi er að búa í nánd við náttúru í bæjarfélagi sem umkringt er fallegum gönguleiðum, hvort sem er við sjávarsíðu, í skóglendi eða upp á fjalli. Fuglasöngur og hófadynur fylla loftið í kvöldkyrrðinni. Ríkidæmi sem ekki er sjálfgefið og ber að varðveita. Passa þarf upp á að stækkandi bær glati ekki sérstöðu sinni sem sveit í borg.

Umhverfismál eru sífellt fyrirferðameiri í hugum flestra. Margir bæjarbúar láta sér ekki nægja að fegra og snyrta garðinn sinn heldur taka til hendinni í nærumhverfi og leggja sitt af mörkum, til dæmis með því að plokka. Þeim fjölgar sem líta á reiðhjól sem raunhæfan kost í samgöngum.

Gott samstarf milli fulltrúa allra lista hefur náðst á vettvangi umhverfisnefndar bæjarins það sem af er af kjörtímabili og hefur það meðal annars skilað sér í metnaðarfullri umhverfisstefnu Mosfellsbæjar sem samþykkt var síðasta haust. En mikilvægt er að efndir fylgi orðum og stefnan sé höfð að leiðarljósi í allri starfsemi sveitarfélagsins.

Spennandi áfangar eru í sjónmáli, svo sem langþráð opnun gas- og jarðgerðarstöðvar SORPU á Álfsnesi sem mun umbylta meðhöndlun lífræns úrgangs frá heimilum höfuðborgarsvæðisins og stórauka framboð á vistvænu svansvottuðu íslensku eldsneyti, metani. Unnið er með Umhverfisstofnun að gerð stjórnunar- og verndaráætlunar fyrir Álafoss og Tungufoss og horft er til mögulegrar stækkunar á friðlýstu svæði við Varmárósa. Leitað er varanlegra leiða til að tryggja vernd og notagildi Varmár sem útivistarsvæði í hjarta bæjarins. Mörg önnur verkefni á sviði umhverfismála bíða okkar og ég hlakka til þeirra.

Göngum vel um náttúru og njótum sumarsins í fallega bænum okkar.

Michele Rebora

Aðalmaður Vina Mosfellsbæjar í umhverfisnefnd