Vorhreingerningar

Veturinn í vetur hefur verið afskaplega blíður hér í bænum og lítið tilefni til að kvarta undan veðri. Engu að síður kitlar hækkandi sól og lengjandi dagar eflaust marga þessa dagana og fólk farið að huga að vorverkum, hvort sem er í görðunum, hesthúsum, bílskúrum eða geymslum.

Vorinu fylgir oft innileg löngun til endurnýjunar, til þess að taka til og gera hreint. Tiltektin og endurnýjun skila okkur vellíðan og snyrtilegt nærumhverfi en leiða jafnan af sér einhverskonar úrgangur, einhverju „drasli“ sem við þurfum að losa okkur við. Þá er gott að staldra dálítið við og velta fyrir sér hvernig best er bera sig að.

Sumt sem við sjálf höfum ekki lengur not fyrir getur komið sér öðrum vel. Nýtum okkur t.d. hverfissíður á Facebook og auglýsum hlutina gefins, spörum okkur sporin og stuðlum um leið að betri nýtingu auðlinda. Endurnotkun er besta tegund endurvinnslu.

Ef við erum með garð er tilvalið að koma sér upp moltugerð sem getur tekið við laufum, grasi og öðrum minni garðúrgangi, ásamt flestum lífrænum eldhúsúrgangi. Þannig drögum við úr akstri, viðhöldum við hringrás næringarefna á staðnum og fáum fínan áburð án búðarferða.

Auðvitað verður alltaf þó eitthvað sem við þurfum að losa okkur við og keyra í SORPU. En þá er gott að kíkja á vef þeirra, sorpa.is, og skoða vel hvaða flokkar eru í boði á okkar ágæta endurvinnslustöð hér að Blíðubakka. Rusl er nefnilega ekki bara rusl og fullt af því er hægt að endurvinna, sé því komið í réttan farveg. Það er því mikilvægt að kynna sér möguleikana og skipuleggja ferðirnar eftir því.

Hreingerningarþörfin nær af sjálfsögðu líka til bílanna okkar; meira og minna salt-skítugir kaggar biða þess eins að verða þrifnir. Munum þá að innkeyrslur og bílaplön eru almennt ekki staður til þess. Tjöruhreinsir og drullugt sápuvatn mega ekki renna niður götuna og hverfa ofan í niðurfalli. Þau hverfa nefnilega ekki, heldur berast óhreinsuð í lækjum og ám og eyðileggja lífiríki þeirra. Notum viðurkenndar bílaþvottastöðvar og þvottaplön bensínstöðvar þar sem frárennsli fer í gegnum viðunandi hreinsivirki áður en því er veitt í fráveitukerfi.

Sleppum svo fram af okkur beislinu í vorhreingerningum og hjálpumst að í að fegra bæinn okkar eftir veturinn. Að plokka er til að mynda frábær leið til að sameina útihreyfingu og umhverfismál. Og það er ekki bara ruslið sem tínt er upp, heldur ýtir snyrtilegt umhverfi undir betra umgengni. Svo ekki sé talað um mikilvægi jákvæðs fordæmis.

Já, það er vor í loftinu og gildir einu þótt eitthvert páskahret sé eftir, tiltektin er hafin.

Michele Rebora fulltrúi Vina Mosfellsbæjar í umhverfisnefnd.